وقف.

وقف يا أبني وقف..

وقف لذكرى ناس سرقت أرض من تحت أجرين شعب.. 

وقف لذكرى ناس خبت ذكريات شعب كامل ودفنتهن لتحت بعيد

وقف لذكرى ناس هدّت بيوت لحتى المفاتيح ما تنفع

وشردت الملايين وما أعترفت..

وقف لذكرى ناس غطت صرخات ولاد وبكى أطفال بأصوات البواريد

وزورت الحقيقة لحتى قالو الجرّاح جريح..  

وقف لذكرى ناس غشت كل مدن العالم وبالمال سكتتهن

وقف يا أبني لعالم ما عم يتغير غير للأسوء..

وقف تقولك وقف وتبكبك .. 

بتعرفو هادا الشعور لما تقرأ أشي .. وتتنهد مرّة، ومرتين، وتلاتة .. وتضل تعيد الجمل براسك.. والدموع تنحبس بعينيك ومتسترجيش تنزل ..
كل هادا عشان شخص غريب "فَضَحَك" قدام حالك..  وقلك الحقيقة المُرَّة بدون ما يستحي..
شخصي الغريب كان "جبران خليل جبران" ..
وبهاي كسرني ..: 

"والبعض نحبهم

لكننا لا نجد صدى لهذا الحب في

قلوبهــم

فننهار و ننكسر

و نتخبط في حكايات فاشلة

فلا نكرههم

ولا ننساهم

ولا نحب سواهم 

ونعود نبكيهم بعد كل محاوله فاشلة "

(من افحل ما عملت جوجل)

البحر..

البحر هوي المحل الوحيد اللي برغم من هدوئه، بالرغم من الجو الرومنسي والامواج ، بتفكرش بحدا.

بولا اي حدا.

بتفكر كتير.. بس بولا أي أشي طبيعي .. 

بأشيا ما بتخطر عبالك بحياتك اليومية.. 

وبتكون مرتاح .. 

وشو فكّرت غاد.. بضل غاد ..

بتتركهن للمرة الجاي.. 

لل بريك الجاي من الحياة ..  

بتحبش توسخهن بهمومك العادية .. خليهن سبيشل.. خليهن غاد.. 

بتحاول تتمتع بكلشي حواليك..

بتشعر بنسمة الهوا اللي بتيجي بالسيعة مرّة .. وبالشعر اللي بتطاير لوهلة.. 

باجريك اللي عم تدحشهن تحت الرمل، والرمل السخن اللي عم بسحل عنهن كل مرة..

بزعاق ولاد زغار، بس هون غير اي محل تاني، بيجي بمحلو، المفروض ايكون عشان تكمل الصورة .. 

انا مغرمة .. بالرمل، الشَمْس والبَحِر.. 

يا محلى الفسحة يا عيني 

على رأس البَحر

والقمر نوّر عيني

عيني عيني

على موج البحر

اتطلعتو عل قمر اليلة ؟ اكيد لأ.. اوكي بحب اخبركو انو كان مدوّر، ضاوي ، ولحالو.. 

هديك اللحظة اللي بتفهم فيها قدي انت لحالك مهما ناس كانو حواليك .. والوحيد اللي ممكن ايكون جمبك هوي هادا الشخص الاسطوري

 اللي رح يفهمك ويحبك واللي بشي طريقة عجيبة كتير ناس عم بتلاقي بالآخر.

 بتحس قدي انت هوي انت ، الناس بتروح وبتيجي وبس الذكريات بتضل، وطبعا بأترو على شخصيتك بس بتركوك

 وانتبه توقع بحب شخص مش واعيلك، شخص مش مستوعب قدي عم تعطي حب واهتمام. النتائج بس بتكون سلبية عليك، وولا بهزلو بدن. 

 ناسي اصدقائي واحبابي : بحبكو تفهمونيش غلط ، بس كل واحد بالاخر عندو حياته وهمومه، وبالاخر غصبن عنكم رح تتركوني، وتتذكرو انو قلتلكوا.. بس مش رح انسى كيف بشي مرحلة خليتوني احس منيح.. 

وهاي الفكرة اني لحالي بين كل هل ناس، بتخوف وبتخوف بكميات كبيرة..  بس يمكن اسا اغدر اعمل اشيا إلي ، تبسطني واشيا انا بدي اياها ( فرضا بعرف مين انا) ..