عفكرة

عفكرة،
لما فتت عل بار، انتحر قلبي قد ما دق بسرعة.
سلمت علي، وطلعت.

random thought

who said that finding love and getting married at an early age is wrong? the exact opposite, it is the most beautiful thing to find someone who suits you early in life.

the wrong thing is if you got married just to please the society and that would lead later on to a miserable life.

find love, celebrate life, be happy.

احاسيس ٢

خليك اكتب ستاتوسات
خليك قلي بحبك انت وروحك
خليك قلي بحب الاشي اللي بينا
واشتقتلك، كتتير اشتقتلك.
ومع هيك: لا بدك تعرف اخباري
لا احوالي
ولا مشاريعي
لا بتخبرني عن احلامك
عن يومك ولا جمعتك

شو نفع الشغف، اذا بجي لحاله؟
زهقت ، والله تعبت. 

بخوف ؟ طز

دايما صعب تجرب اشيا جديدة
دايما.
ولا حدا بالحياة بعمل اشي جديد بالصبابا.

في رهبة
في خوف
في تساؤلات عديدة
يا بتخليك تتراجع، وتضلك بال safe zone تاعك
يا بتنقلك لعالم جديد اللي بوخد عالمك اللي قبل وبس بزيد عليه اشيا. ويااا ويلييي الادمان على هاي العوالم الجديدة :)

بس كل مرة، بعد ما امرق الاشي، بنسى المصاعب..
بخوّف ؟ اه. بعرف.
بس انا حاسة انو رح يكون كلشي تمام، متل دايما. ورح اضحك عكلشي كان.

يللا باي،
في بعد بلايا موسيقى لازم اسمعها

https://soundcloud.com/ibrahim-maalouf/verdict-1

احاسيس

تعو نحكي لمرة وحدة بس بالاحاسيس، بدون محاولة شرحهن.
حاسة في اشي معلق بحلقي، قاعد عقلبي.
حاسة مش غادرة اتنفس ولا ارتاح
انو اهرب، الهي حالي، اعمل اشيا اللي بتبسطني مساعدش.
بعدني لما اقعد بالتخت بالليل، بحس حالي منهكة، ومش عارفة من شو.
ومش غادرة ابكي، دموعي محبسة مش عم تنزل.
نفسي الاقي طريقة انفض حالي متل ما بنفضو السجادة.

ومع كل الغلط والفوضى بعلاقتنا، بس لما بكون معك بحس امان، بحس فش اشي ببالي وولا اشي مهم حاليا غير هاللحظة.
والانيك، انو شكلها القصة بدها شهور تاشوفك.

معقول حبيتك هالقد؟ 

اواعي اواعي

"لي مشتريتيش اواعي؟ الله يسامحك على هل عملة"

اه اه.. 

هادا اول سؤال امي بتسألني ايا بعد السفر.

شكرا.

جدا.
جزيلا.

اوتستراد - ماشي

https://www.youtube.com/watch?v=Y3k1Lw_gh0U&feature=youtu.be

من بعد سماعها شي 80 مرة..
لازملها صار بلوج

"
بالي مشغول ناسيني
خلالي ليلي يطول

بالي مشغول، ناسيني
خلالي ليلي، ليلي يطول..

ماشي 80 ، ومريّح جير، براسي ما في ولا فكرة، وشو ما يصير يصير.

بالي مشغووول.. ناسيني!
خلالي ليلي ليلي يطوووول..

"

وهاد هو

اركككظ

فوتونا بهادا الراس
اخخ منهن
براس الركض، براس مش ملحقين، براس لازم نضل نشتغل
عشان خايفين .. عشان خايفين نموت بلا مصاري
عشان خايفين نمرض ميكنش معنا مصاري
عشان بدنا نشتري كتير اشياء
عشان اقنعونا انو بحاجة لكتير اشياء
عشان حتى تلفون واحد بطل يكفي
ولا بيت يكفي بس ليؤوي الواحد
ولا فستان، فستانين ولا تلاتة
وصار ممنوع انموت وينتا بدنا
مجبورين نعيش
لأخر نفس
حتى لو مذلولين
لازم انخاف بس من الاسلام
والسود
والفقراء
والملحدين
والعرب
والهيبيز
لازم ننعجق عكل العاب المونديال
وننسى الحروبات اللي عم بتصير
محسنهن بعطونا برييك
محسنهن يا الله
وينتا طالع الايفون الجديد ؟ خلص بكفي اللي معي صلو شهرين.


* سخرية اه؟ اخخ عل وضع. باي باي علي شغل

انتفضي، انا معك.

متذكر كيف التقينا؟

كنا نتلاقى من عشية تحت الشمسية 

ماسكلي ايدي وبتنادي 

وبتصرخ وبتدعي للحرية

حرية المرأة، حرية الفكر، وحرية التعبير عن الرأي

كنت تقلي: "انتفضي، محدا بطلعلو اكتر منّك

انتفضي انا هون معك 

انتفضي انا مش رح اتركك" 

وانتفضت 

حاربت الكل، حاربت عشان مبادئنا، او اللي فكرتها مبادئنا.

وبس كبرنا، وبالجيزة فكرنا انت هربت.

"انا بحبك بس..

ما بغدر خالف اهلي يا صبية، مجبور ارضيهن

ما حبوكي، ما هضموكي، بصفوكي بالكتير مثقفة ومش خرج جيزة

المشكلة مش منّك، انت بتجنني وكلشي، تمام؟ بس لولا اهلي يا صبية"

وراحت صديقتنا مصدومة، وتغيرت 

المكياج ما بنزل من وجها وبطلت تترك المجمعات التجارية

وبصيرو بقولو عنها "اتطلعو قدي سطحية، ما بتهتم اللا بمنظرها والماركة  اللي لابستها"

*هادا لا شعر ولا عبالو.. بالصدفة طلعو كم كلمة عل وزن. القصة وما فيها مش قصة رمانة، القصة قصة قلوب مليانة. 

بالعربي: حلو عن البنات، ورا كل صبية في قصة بتقشعر البدن.

شالوم عليخم - وحياة الله؟!!؟

لكل الناس اللي عصّبت على ابو مازن ، على تصريحاته اللي بتنوصفش بغير " مالك بتتهبل مالك!"
بالفترة اللي انقتل فيها 6 شهداء وولا حدا جاب سيرتهن.
لأبو مازن اللي بسهولة تنازل عن اغلب الاراضي وعن اهم شي: حق العودة.
مهو خرى على اللاجئين بالمخيمات. اللا شو.. !!
ولاي.. حدا منّا خاننّا  ! او سوري حدا فكّرنا مننّا.


بهاي المناسبة، في اغنية أنعملت خاصة عشان تعبر عن كل هادا الحكي :

ونزار.. فشتلنا غلنا.

انتفضي لطيزي.

بمناسبة عيد المرأة بحب اسألكو : هل احنا غير؟

الكل عم بحاول يحارب المجتمع، يغيره ويغير العادات الموجودة.
عاملين حالنا الفهمانين والحضاريين ومنلوم غيرنا- منلوم كل صبية ملحقتش حلمها او كل بنت مبلغتش عن ضربها من قِبل ابوها.
منشجع الانتفاضة والانقلاب عل ظلم.
وبعدين؟ وبعدين لما هل صبية توكل ضرب او حتى تموت منشفق عليها، منحط كلشي تحت عنوان "شرف العيلة" وكأنه هاي المشكلة الوحيدة عند النساء العربيات. وكأنه لازم توصل "لشرف العيلة" لحتى تعنّف. واهم اشي - لقينا كمان موضوع لستاتوسات.
حاولو مساعدة الجيل الحالي، بس متلوموهنش.

وهون بيجي سؤالي: مش احسن وأهم نغير الجيل الصاعد؟ نتأكد انو احنا - جيل الشباب - لمّا يكوّن المجتمع، نكون واقفين عند مبادئنا الحالية؟
تخيلو معي الاولاد اللي رح يخلقو كمان 5-6 سنين يربو عنجد على المبادئ اللي كتير عم منّاشد فيها. فكركو بتزبط؟
منضل وقتها عل شعارات اللي مقتنعين فيها اليوم؟
وللا لما الواحد يقلب اهل ويكون عنده ولد بنجر وبمشي مع التيار؟
يمكن لازم نشتغل على ترسيخ هاي القيم فينا لنتأكد عل قليلة انو المستقبل يكون افضل.

* ما تفهموني غلط، انا مع التغيير، ,وكتير حبيت انو عل قليلة الناس عم بتناشد بالتغيير.
واه، كل عام وانت بخير، يمكن اليوم عل قليلة يطلعلك تنفدي من الطبخ.

انتخابات الناصرة - شو رايك؟ بهمنيش.

خلص لازم احكيها: 

"قلعطونا "، "شو هادا يا " ، "لأ والله كنت مع علي بس بعدين غيرت رأيي"  - وكل هل حكي واكتر من ناس مش من الناصرة. 

يا جماعة قلعتطونا! يعني بصرش الكل يحكي كأنه هوي اللي متضرر ومتأتر من الموضوع وهوي مش من الناصرة اصلا! 

حاجي تفلسف يا ! ما بتصدقه تلاقو اشي ! 

بكفي تكهنات ونظريات! بدك تعرف شو عنجد بصير وشو احسن؟ انزل عالناصرة اسمع من الناس غاد. 

تبداش تحللي اياها سياسيا ونظريا وفلسفيا.  

بحس الناصرة متل طابا: بس صارت المشاكل وكترت غاد الناس صارت تتحسر وبالأساس عشان بتغدرش تروح مشوار لغاد، وناسية انو في ناس اللي حياتها اليومية غاد وعم بتواجه المشاكل. 

اتذكر ، بالاخر انا وغيري اللي ساكنين بالناصرة ومش انت. اي اشي بصير انت رح تكتب ستاتوسات عنو بس احنا اللي رح نواجه. 

بدكو تساعدو ؟ يا ريت ، بس مش بتسميع حكي، عشان شبعنا حكي وتحليلات. 

وبتأمل ميتاخدش البوست شخصي اكتر من اللازم.