حتى لوينكو سكرانات!! بصرش!! بصرش تقللو احترام وتتهبلو على كل ديانات العالم !
بقولو وانت سكران بتقول اللي بقلبك، بدون ما ضميرك يوقفك.
وهادا بخليني استوعب كيف في ناس بتسمي حالها "متحضرة" و " منفتحة" بس بالاسم .
مش شطارة اي شخص يقعد يتهبل ويذل ديانة تانية بس عشانو مش مقتنع فيها. بحب اذكركو انو احنا هون متساويين، او المفروض هيك انكون .. وهاد معنى انّو كل واحد فينا عم بحاول ايلاقي الطريق "الصح" للحياة.
فش اشي اسمو ديانة كاملة غلط. في اشي اسمو انت مش موافق ع مبادئها، وممكن ومحبذ تجادل بشكل متحضر ع هاي الاشيا..
بس دائما وابدا، تكنش عاملّي حالك ملك زمانك! احترم اللي قبالك واحترم آرائو ومبادئو.
مش يعني عشان انا بآمنش اذاَ انا صح.. يمكن انا الغلط بحالو.. و ولا مرة رح اكون متأكدة شو انا مآمنة.. بعرف انو عندي مبادئ، اهمها انو الناس ضايعة متلي ، وهيي حرّة بأفكارها ما دام الدين بشكلش عائق عشان ينفذو مهام يومية وبشكل متساوي .
بتعرفو شو اكبر غلطة بترباية الولاد الزغار؟!! انو بربطو كلشي بالدين!!!
"لي تحترم أمك ؟ عشان هيك مكتوب بالوصايا العشر." اا عنجد ؟! واذا واحد بطل ايآمن فيهن هدول خلص؟ بغدر يبطل ايشيلها من ارضها؟!
"لا تسرق! .. " كمان هاي، دخلك صعب اتقولّو انو هادا الأشي مش ألك، وعشان هيك مش لازم توخدو.. بتحب حدا يوخدلك غراضك؟
والقائمة بتخلصش، بس افكر الفكرة وصلت..
يا جماعة الحياة بتتغير.. وأفكارنا ممكن تتغير من يوم للتاني.. خلو الافكار على جنب ومبادئ تعاملك مع الناس على جنب تاني..
وسلامات..
ليست هناك تعليقات:
إرسال تعليق